अमेरिकामा स्थायी बसोबास गर्दै आएका नेपालीले आफ्नो परम्परा र संस्कृतिको जगेर्ना गर्दै निकै रमाइलो वातावरणमा बडादशैं मनाएका छन् ।
अमेरिकाका कैयौं राज्यमा छरिएर बसोबास गर्दै आएका नेपालीले विजया दशमी २०७९ का अवसरमा बुधवार आफ्ना मान्यजनबाट टीका, जमरा र प्रसाद ग्रहण गरेर दशैं मनाएका हुन् । नेपालीले कतै आआफ्ना घरबस्तीमा त कतै मन्दिर या सार्वजनिकस्थलमा जम्मा भएर सामूहिकरूपमा दशैं पर्व मनाएका हुन् ।
अमेरिकी जीवनशैलीमा व्यस्त भएर आफ्नो जीवनयापन चलाइरहेका नेपालीले विभिन्न राज्यमा स्थापित मन्दिरमा पुगेरै टीका ग्रहण गरेका तस्वीर पनि सामाजिक सञ्जालमा राखेका छन् । नेपालीको उपस्थिति बाक्लो रहेका टेक्सस, न्यूयोर्क, मेरिल्याण्ड, क्यालिफोर्निया, भर्जिनिया लगायतका क्षेत्रमा नौरथा शुरू भएदेखि नै घरमा मकै र जौका जमरा राखेर स्थानीय समयअनुसार बुधवार टीका र जमरा ग्रहण गरेका हुन् ।
पछिल्ला वर्षमा नेपालीले अपार्टमेन्टको बसाईभन्दा व्यक्तिगत घर खरिद गर्ने संख्या पनि उल्लेख्य मात्रामा बढ्दै गएकाले पनि आफ्ना घरमा नै घटस्थापना गरेर जमरा राख्ने प्रचलन बढेको देखिएको छ । एकै स्थानमा ४०–५० को संख्यामा नेपालीको घर भएका स्थानमा एकआपसमा मिलेर जमरा राखेर टीकाको दिन त्यही स्थानबाट बाँडफाँट गर्ने गरेको पनि पाइन्छ । यसरी राखिएको जमरा विजया दशमीका दिन मान्यजनको हातबाट टीकासहित ग्रहण गरिन्छ ।
विगत १६ वर्षदेखि न्यूयोर्कमा बस्दै आएका भागवत शर्माले दशैंका लागि भनेर १ महिना पहिला नै आफू काम गर्ने कम्पनीबाट बिदा लिएर बसेको बताए । उनले भने, ‘१ दशकअघिको तुलनामा अहिले दशैं मनाउने समूह बढ्दै गएको छ ।’
उनको अनुभवमा १ दशकअघिसम्म जमरा राख्न पनि गाह्रो पर्ने गरेकामा विगत ४–५ वर्षयता जमरा राख्न सजिलो भएको र जमघटमा पनि बाक्लो उपस्थिति हुने गरेको छ । यसरी अमेरिका बसोबास गर्ने नेपालीबीच पनि दशैं मनाउनेक्रम बढ्दै गएको देखिएको छ ।
शर्मा भन्छन्, ‘पछिल्ला वर्षमा नेपालीको कडा परिश्रमका कारणले व्यवसाय तथा रोजगारीमा वृद्धि भएसँगै आफ्ना चाडबाड र रीतिरिवाजमा बढी ध्यान गएको मैले अनुभूति गरेको छु । यसले हामीबीच आपसी भाइचारा र सम्बन्धमा विस्तार भएको छ र कुनै महत्त्वपूर्ण अवसर या कसैलाई गाह्रो सारो पर्दा पनि एकजुट हुन सजिलो भएको छ ।’
कोरोना महामारीपछि आफ्ना नजिकका आफन्तजनसँग कुराकानी, भेटघाट गर्न र दशैं मनाउन कतिपय नेपाली एक राज्यबाट अर्को राज्यसम्म यात्रा गर्ने गरेका पनि बताउँछन् । कोरोना महामारीका कारणले आक्रान्त बनेको अमेरिकामा बस्दै आएका नेपालीमा विगतको तुलनामा आपसी सहकार्य र सम्बन्ध पनि वृद्धि हुँदै गएको छ । सय वर्षपछि ठप्प भएको अमेरिकी जनजीवनलाई नजिकबाट भोग्न पाएका आप्रवासी नेपालीलाई आफ्नो चाडबाड र आफन्तको खोजीमा चासो हुन थालेको देखिन्छ ।
सायद यसैकारणले होला यसपटकको दशैंमा हरेक राज्यमा बाक्लो जमघट भएका दृश्य यत्रतत्र देखिएको छ ।
दशैंका लागि भनेर नेपालबाट समेत अभिभावक झिकाएर अमेरिकाको भूमिमा दशैं मान्न पाउने आफूलाई भाग्यमानी सम्झन्छन् । उनीहरूले नेपालबाट आएका अभिभावकसँगै प्रवासी भूमिमा दशैं मान्न पाउँदा असाध्यै खुशी लागेको प्रतिक्रिया दिएका छन् । – मधुकर अधिकारी/रासस
